D'Gründig

Dr Jodlerklub Mötschwil isch erschtmalig im 1925i gründet worde. Währed em zwöite Wäutkrieg het sech der Verein aber de müesse uflöse. Dr damalig Gaschtwirt vom Restaurant zum Schütz ds Mötschwil, dr Karl Bürge-Born het de im 1957i d Nöigründig usglöst. Är het de ou grad während de erschte acht Jahr ds Dirigänteamt überno. Öpe eis het är de di Mötschwiler chli müesse ufmunterä u hets verschtangä sine Sänger nöji Impulse ds gä. Us däm Jodlerklub hets de ä singfröidigi Truppe gä u gärn hei si ou nach der Prob no äs paar Liedli zur Ufmunterig gsunge.

Im 1961i isch de dr Jodlerklub Mötschwil am Bärnisch Kantonale Jodlerverband byträtte u im glyche Jahr hei si am Jodlerfescht ds Münsige teilgno. Sieder här het der Jodlerklub Mötschwil geng ume eis a de Jodlerfescht teilgno u mängs schöns Erläbnis mit hei gno.

Wär mir sy

Zur Zyt zeut dr Jodlerklub Mötschwil 20 Sängerinne u Sänger. Ds eutischte Mitglied isch der Heiri, är het scho si 77ischt dörfe fyre. Ds tröischte Mitglied isch dr Fritz, är singt scho syt 49 Jahr bim Jodlerklub Mötschwil. Di nöiste Mitglieder si dr Dinu u Zeno wo mir im Früehlig 2024 hei bi üs dörfe wähle. U üser jüngste Mitglieder si mit 19i zuenis cho.

Was mir mache

Im Vordergrund steit ds gmeinsame Singe während de Probe, nach de Probe u a diverse Uftritte u Aktivitäte.

D’ Jodler hei jewils am Dsisti im Kirchgmeindhuus ds Hindubank d Prob. Di richtige Tön, dr rächt Schliff, u de no meh Dynamik, das aues tuet üse Dirigänt dr Beat Stalder mit üs ystudiere u probe. Nume dr Text, dä müesse mer säuber uswändig lehre.

Mit em Beat schaffe mir syt Februar 2023 zäme. Är isch ä erfahrne Sänger u Dirigänt mit eme guete Ghör.

Fescht i üsem Jahresprogramm stöh ds Konzert im Jäner u ds Zwirbel im Ougschte. Ä Reis ghört au Jahr derzue u de gits no äs gmeinsam Brätle im Summer. Wo mir süsch no ufträtte u was mer ou no wei ungernäh tüe mer de gmeinsam feschtlege u diskutiere. Houptsach, nid ds viu.

Kontakt

Mir beantworte gärn öier Frage.