Härzlech wiukomme

bi üs mötschwiler!

Liebi Jodlerfründe

Härzlech wiukomme uf üsere Internetsyte. Äs isch üs ä grossi Fröid üses Bruchtum mit öich chönne ds teile. Sigs us Gwunger hie im Internet, us Inträsse u Fründschaft a eim vo üsne Aläss. Oder unger Umstände sogar usem Härz a üsne Probe.

Schön syt dir derby, lueget u loset was mir so mache.

üse nächst alass!

Am 5. März hei mir üsi Houptversammlig u dr nächst Uftritt isch de am Jodlerfescht ds Langnou im Ämmitau vom 14.-16. Juni 2024.

Bis dert häre tüe mer flissig üebe u probe u natürlech scho d'Lieder fürs nächste Konzert ystudiere.


mir sueche di!

Dir gfaue di Bärndütsche Lieder oder losisch gärn Jodulieder u tätsch äch öpe ou gärn singe? De bisch Du bi üs genau richtig. Eh ja klar, ou wennde meinsch Du chönsch nid jodle. Genau settegi bruche mir ja ou. Wiu Jodle tüe nume äs paar wenegi. Aui angere tüe dr so genannt Begleit singe. U vergiss nid, mir Jodler si ou aues nume Laie u hei einisch bi Null agfange. Häb nid Angscht u chum zuenis ane Prob eifach einisch cho ychelose. Probe tüe mir im Kirchgmeindhus Hindubank. Üsem Presi am Marc chasch vorher hurti Bscheid gä, 076 488 55 04.

üse Letscht alass!

Hemmli glette, Schueh glänze, Züpfli flächte, Mutz alege, Tracht büschele, Frisur strähle, schminke, Fingernegu verlengere, Krawatte binge u los geits mit em Konzert & Theater!

Am 26. / 27. / 28 Jäner isch es sowyt gsi. Äs isch äs wunderschöns Wuchenändi gsi, mit interessante Gäscht, super Publikum u mit viu Gsang u Musik. U ändlech hei mer chönne luege, was üsi Theatergruppe sider äm Ougste het ygstudiert. Biuder derzue fingsch bi de Ydrück.


üse Vor-letscht alass!

Am 23. September si mir üsem langjährige Ehrenmitglied is Seniorezentrum z'Oberburg ga singe. Äs het üs fescht gfröit, hei mir zu dir chönne cho singe u de Zuehörende dermit ä Fröid mache.

Ä settige Uftritt ghört bi üs jedes Jahr zum Jahresprogramm u macht dene Bewohner aube ä grossi Fröid. Chunt de öpe äs bekannts Lied dra, de häufe de gärn di einte oder angere mitsinge, stiu für sich u vouer Erinnerige a früecher.


Chlinigkeite bi üser Tracht!

D Mötschwiu Jodler träge dr typisch Bärner Mutz us hochwärtigem schwarzem Samt u mit wyssem u rotem Band ygfasst.

Üser Froue träge aui d Gotthelf-Tracht. Das isch ä eifachi aber doch viusytegi Tracht u sunndiget üser Froue.