Härzlech wiukomme

bi üs mötschwiler!

Liebi Jodlerfründe

Härzlech wiukomme uf üsere Internetsyte. Äs isch üs ä grossi Fröid üses Bruchtum mit öich chönne ds teile. Sigs us Gwunger hie im Internet, us Inträsse u Fründschaft a eim vo üsne Aläss. Oder unger Umstände sogar usem Härz a üsne Probe.

Schön syt dir derby, lueget u loset was mir so mache.

Üse nächscht Alass!

Am Sunndi 10. Oktober dörfe mir ir Chiuche ds Hindubank alässlech vom Ärntedank-Gottesdienscht singe. Mir fröie üs uf zauhryche Bsuech une gmeinsame Schwatz bim aschliessende Chiuchekafi. Dr Gottesdienscht startet am 09.30 Uhr.

Üse letscht Alass!

Härzleche Dank für öie Bsuech bi üsem Zwirbele ds Mötschwil. Schön, hei mir wieder einisch öpis dörfe dürefüehre u bekannti Gsichter gseh.

SCHNUPPERSINGE


Nach em Motto LUEGE... LOSE... SINGE...

Tuesch gärn gmeinsam mit angerne zäme singe, hesch Fröid a Jodulieder. Da isch üses Schnuppersinge ä gueti Glägeheit. Darfsch gärn unverbindlech cho icheluege u lose, am Dsisti Abe ab 20.15 Uhr tüe mir probe. Mäud di doch bi eim vo üsne Mitglieder, bim Presidänt oder über ds Kontaktformular.


Chlinigkeite bi üser Tracht!

Eifach schön...

D Mötschwiu Jodler träge dr typisch Bärner Mutz us hochwärtigem schwarzem Samt u mit wyssem u rotem Band ygfasst.

Üser Froue träge aui d Gotthelf-Tracht. Das isch ä eifachi aber doch viusytegi Tracht u sunndiget üser Froue.